Har chand teri yaad junun-KHez bahut hai

har-chand tirī yaad junūñ-ḳhez bahut hai

maiñ jaag rahā huuñ ki havā tez bahut hai

kyuuñ kar na mire tan se chhalak jaa.e ḳhamoshī

paimāna-e-jāñ zabt se labrez bahut hai

kyā koh-e-girāñ Thahre tirī rāhguzar meñ

ai husn tirī ek hī mahmez bahut hai

ik chāñd kī kashtī hī nahīñ Dūbne vaalī

varna vo samundar to balā-ḳhez bahut hai

gul-dān se lagte hī bikhar jaatī hai titlī

goyā ye rag-e-sañg bhī ḳhūñ-rez bahut hai

palkoñ pe koī phuul nahīñ hai to ajab kyā

kahne ko to miTTī mirī zarḳhez bahut hai

tum ḳhud sā samajh kar na ise haath lagānā

vo ḳhaak kā putlā hī sahī tez bahut hai

dharnā hai kahīñ to ye girāñ-bārī-e-ḳhātir

zaanū jo nahīñ sar ke liye mez bahut hai

kyā hai jo kaTore ke bhī pairāk nahīñ ham

jiine ko to ye hīla-e-tabrez bahut hai

'tābish' jo guzartī hī nahīñ shaam kī had se

socheñ to vahīñ raat sahar-ḳhez bahut hai

ABBAS TABISH

ہر چند تری یاد جنوں خیز بہت ہے

میں جاگ رہا ہوں کہ ہوا تیز بہت ہے

کیوں کر نہ مرے تن سے چھلک جائے خموشی

پیمانۂ جاں ضبط سے لبریز بہت ہے

کیا کوہ گراں ٹھہرے تری راہ گزر میں

اے حسن تری ایک ہی مہمیز بہت ہے

اک چاند کی کشتی ہی نہیں ڈوبنے والی

ورنہ وہ سمندر تو بلا خیز بہت ہے

گلدان سے لگتے ہی بکھر جاتی ہے تتلی

گویا یہ رگ سنگ بھی خوں ریز بہت ہے

پلکوں پہ کوئی پھول نہیں ہے تو عجب کیا

کہنے کو تو مٹی مری زرخیز بہت ہے

تم خود سا سمجھ کر نہ اسے ہاتھ لگانا

وہ خاک کا پتلا ہی سہی تیز بہت ہے

دھرنا ہے کہیں تو یہ گراں بارئ خاطر

زانو جو نہیں سر کے لئے میز بہت ہے

کیا ہے جو کٹورے کے بھی پیراک نہیں ہم

جینے کو تو یہ حیلۂ تبریز بہت ہے

تابشؔ جو گزرتی ہی نہیں شام کی حد سے

سوچیں تو وہیں رات سحر خیز بہت ہے